АҚШ президенти Дональд Трамп Украина президенти Владимир Зеленскийни декабрь ойида Майамида бўлиб ўтадиган «Катта йигирматалик» (G20) саммитига таклиф қилишга тайёрлигини билдирди. Бу ҳақда у 31 октябрь куни Флорида штатидаги Мар-а-Лаго қароргоҳида журналистлар билан суҳбатда маълум қилди.
Журналистлар Трампдан Россия президенти Владимир Путин саммитга таклиф этилганини инобатга олиб, Зеленский ҳам тадбирга таклиф қилинадими, деб сўради.
"Таклиф қиламан. Ҳа, бунда ҳеч қандай муаммо йўқ", — деди АҚШ президенти.
Аввалроқ, 31 октябрь куни АҚШ давлат котиби Марко Рубио Зеленскийнинг саммитда иштирок этиши Трампнинг таклифига боғлиқлигини айтганди. У бу масалада ҳали якуний қарор қабул қилинмаганини билдирган.
Маълумот учун, G20 саммити 14–15 декабрь кунлари Майами шаҳрида ўтказилиши режалаштирилган. АҚШ сентябрь ойида Россия президенти Владимир Путинни ҳам тадбирга таклиф қилган. Трамп ва Путин саммит доирасида учрашиши мумкин.
Шундан сўнг Зеленский Путин билан саммит доирасида учрашишни таклиф қилган, бироқ Россия президенти бу таклифни рад этган. Трамп ҳам яқинда Путиннинг Майамида уч томонлама учрашув ўтказишга рози бўлиш-бўлмаслигини билмаслигини айтганди.
Шунингдек, Марко Рубио Трамп ва Путин бир неча ҳафта ичида учрашиши мумкинлигини маълум қилган. Учрашув 18–19 ноябрь кунлари Хитойда бўлиб ўтадиган Осиё-Тинч океани иқтисодий ҳамкорлиги (APEC) саммити доирасида ташкил этилиши эҳтимоли бор.
Трамп яқинда Зеленский ва Путин билан учрашув ўтказиш режаси борлигини ҳам билдирган. Бироқ у учрашув санаси ва унинг уч томонлама ёки алоҳида шаклда ўтишига аниқлик киритмаган.
