2024 йилнинг 9 ойи давомида мамлакатимиз музейларига жами 3 004 549 нафар маҳаллий ва хорижий сайёҳлар ташриф буюрди. Бу ҳақда АОКАда ўтказилган брифингда Маданий мерос агентлиги ахборот хизмати раҳбари Моҳинур Имомова маълум қилди.
Музейларга маҳаллий ва хорижий сайёҳларни кенг жалб қилиш мақсадида 27 та музейда совғалар ва сувенир дўкони, ҳунармандлар устахонаси ва савдо шохобчалари, онлайн дўконлар, рассомлар, артистлар ва фольклор жамоалари, ҳунармандлар учун ҳамда фотосессия учун махсус ҳудудлар ташкил этилди.
Музейларга инклюзив шарт-шароитлар яратиш мақсадида 53 та музейда пандус йўлакчаси, 9 та музейда кўтарилиш воситаси (лифт) ўрнатилди ва 35 га яқин музейларда аудиогидлар ташкил этилди.
2024 йилнинг тегишли даври давомида маданий бойликларни олиб чиқилиши учун расмийлаштирилган сертификатлар сони 918 тани, унга асосан республикадан олиб чиқишга рухсат берилган ашёлар сони 10,980 тани, маданий бойликларни вақтинча олиб чиқишга берилган сертификатлар сони эса 34 тани, предметлар сони 369 тани ташкил этди.
2024 йил 1 сентябрь ҳолатига кўра республика ҳудудида жами ҳисобда 8 366 та (7836 та давлат мулки, 530 та хусусий мулк) маданий мерос объекти Вазирлар Маҳкамасининг 846-сонли қарорига асосан миллий рўйхатга киритилиб, ушбу рўйхат қайта шакллантирилди.
