Ўзбекистонда таълим олувчиларга нисбатан зўравонликка мойиллиги мавжуд педагог кадрларни аниқлаш ва уларга психологик ёрдам бериш механизмларини жорий этиш режалаштирилмоқда. Бу жамоатчилик муҳокамасига қўйилган 2025 йилга мўлжалланган давлат дастури лойиҳасида кўзда тутилган.
Унда Мактабгача ва мактаб таълими вазирлигига таълим жараёни иштирокчиларини психологик қўллаб-қувватлаш тизимини такомиллаштириш вазифаси қўйилган.
2025 йил октябригача буллинг, суисид, вояга етмаганлар жиноятини олдини олиш, оқибатларини бартараф этиш бўйича педагог кадрлар учун махсус курс ва дастурлар ишлаб чиқилади.
Ўқитувчиларнинг касбий сўнишининг олдини олиш, стрессларга бардошлилик даражасини оширувчи симулятор ва кейслар яратиш режалаштирилмоқда.
Ушбу масалалар ижроси учун асосий масъул этиб Таълимни ривожлантириш республика илмий-методик маркази белгиланди.
