Ижтимоий тармоқларда Қарши шаҳридаги 23-умумий ўрта таълим мактаби директорининг ўқувчилар формаси учун ўқитувчиларга пул йиғиш ҳақида топшириқ бергани кўринган видео тарқалган эди.
Қайд этилишича, Мактабгача ва мактаб таълими бошқармаси масъулнинг жаримага тортилганини очиқлаганди. Мактаб директори жамоатчиликка видеочиқиш қилиб, яхши нияти нотўғри талқин қилинганини айтди ва хатоси учун узр сўради. Бу ҳақда "Миллар" дастурида хабар қилинди.
Мактабимиз шаҳар марказида жойлашгани учун ўқувчиларимиз кўп. Шунингдек, тан олиш керак, аксарият ўқувчиларимиз қимматбаҳо автомобиль ва қимматбаҳо кийимларда дарсга келса, бошқалари имконияти сабаб бундай қилолмайди. Мен ўқувчилар ўртасида табақаланиш бўлмаслиги учун мактаб формасини жорий этиш бўйича таклифимни бергандим. Агар бу ҳолатда нотўғри гапирган бўлсам, узр сўрайман. Мақсадим ўқувчилар ўртасидаги табақаланишнинг олдини олиш бўлган, холос, дейди директор.
Вилоят мактабгача ва мактаб таълими бошқармасининг аниқлаштиришича, мактаб директори Феруза Шуҳратова ҳақиқатан ҳам мактаб ўқитувчиларига 2025 йилнинг 21 январь куни мактабнинг Telegram гуруҳида видеомурожаат қилиб, барча ўқувчиларга “жакет” олиш ҳақида кўрсатма берган. Директор видеода формаси йўқ ўқувчини мактаб дарвозасидан чиқариб юборишини айтган.
Қайд этилишича, ушбу мактаб директорига нисбатан бошқарма бошлиғининг 22 январдаги буйруғига асосан ўртача ойлик иш ҳақининг 25 фоизи миқдорида жарима интизомий жазо чораси қўлланган. Бошқарма таълим ташкилотида мажбурий тартибда ўқувчиларни форма кийишига доир пул маблағларини йиғиш, ташкил этиш, қатъиян тақиқланганини билдириб, бу каби салбий ҳолатларни кескин қоралаган.
