Олти киши бўлган тиббий самолёти Филаделфияда парвоздан кўп ўтмай ҳалокатга учради. Кучли портлашдан чиққан олов бир неча уйни қамраб олди. Бу ҳақда Х ижтимоий тармоғида хабар берилди.
"Биз тирик қолганлар борлигини тасдиқлай олмаймиз. Биз беморнинг оиласи, ходимларимиз, уларнинг оилалари ва ер юзида жароҳатланиши мумкин бўлган бошқа жабрланганлар ҳақида қайғурамиз," - дейилади Jet Rescue Air Ambulance компанияси баёнотида.
Маълум бўлишича, у ерда юз берган авария оқибатида бир киши ҳалок бўлган, яна 19 киши тан жароҳати олган.
Ушбу авиаҳалокат АҚШда сўнгги ўн йилликлардаги энг ҳалокатли авиаҳалокатдан атиги икки кун ўтиб содир бўлди.
Филаделфиядаги эшик қўнғироғи камераси самолётнинг савдо маркази ва қатнов қисми ёнида ерга қулаб, портлагани акс этган кадрлар тарқалди.
"Биз фақат қаттиқ ҳайқириқни эшитдик ва унинг қаердан келаётганини билмадик. Биз шунда орқамизга ўгирилиб, катта шлейфни кўрдик," - деди уй эгаси Жим Куинн.
Аиаҳалокат асосан бизнес-жетлар ва чартер рейсларига хизмат кўрсатадиган Шимоли-Шарқий Филаделфия аэропортидан тўрт километрдан камроқ масофада содир бўлган.
Learjet 55 самолёти 18:06 да аэропортдан учиб чиқиб, 1600 фут (487 метр) баландликка кўтарилганидан кейин дарҳол радарлардан ғойиб бўлган.
У Миссури штатининг Спрингфилд шаҳрига йўл олган ва парвозларни кузатувчи Flight Aware сайтига кўра, Med Jets компаниясида рўйхатдан ўтган. Айрим маълумотларга кўра, самолёт бортида мексикалик қиз бўлган, у АҚШда даволанишдан сўнг онаси ҳамроҳлигида уйига қайтган.
Президент Дональд Трамп Truth Social ижтимоий тармоғида ҳалокатни кузатиш "жуда қайғули" эканини ёзди.
"Яна ҳам кўпроқ бегуноҳ жонлар йўқотилди," - деди Трамп.
