Рақобат қўмитаси томонидан “Рақобат тўғрисида”ги Қонун ва бошқа қонуности ҳужжатларнинг талабларига риоя этилишини таъминлаш, нархларнинг асоссиз ошишининг олдини олиш, истеъмолчилар ҳуқуқларини ҳимоя қилиш ва табиий монополия субъектларини тартибга солиш борасида бир қатор таҳлил ва назорат ишлари олиб борилмоқда.
2024 йил давомида ўтказилган ўрганишлар натижасида, Рақобат қонунчилиги талаблари бузилган 400дан ортиқ ҳолатлар юзасидан хўжалик юритувчи субъектларга нисбатан белгиланган тартибда ишлар қўзғатилган.
Олиб борилган ишлар ва Қўмита томонидан берилган кўрсатмалар натижасида 200 мингдан ортиқ истеъмолчиларга 50 миллиард сўмга яқин маблағ қайта ҳисоб-китоб қилиниши таъминланди.
Жумладан, "O'ZSUVTA'MINOT" АЖ томонидан Вазирлар Маҳкамасининг 2010 йил 28 октябрдаги 239-сонли қарори билан тасдиқланган Низомда назарда тутилган нарх шакллантириш талаблари бузилганлиги аниқланди. Бунинг натижасида "O'ZSUVTA'MINOT" АЖ томонидан 7 млрд сўмга яқин ортиқча даромад олинганлиги маълум бўлиб, тегишли кўрсатма берилди ва ижроси таъминланди.
"HUDUDIY ELEKTR TARMOQLARI" АЖ
Корхона ва унинг ҳудудий филиаллари томонидан Ўзбекистон Республикаси Вазирлар Маҳкамасининг 2023 йил 29 декабрдаги 722-сонли қарори билан тасдиқланган Низом талаблари бузилиши натижасида 5 млрд сўмга яқин ортиқча даромад олинганлиги аниқланиб, истеъмолчилар фойдасига қайта ҳисоб-китоб қилиш бўйича тегишли кўрсатма берилди ва ижроси таъминланди.
Рақобат қўмитаси томонидан бу борадаги тегишли назорат тадбирлари давом эттриилмоқда.
