Тожикистоннинг Хўжанд шаҳрида 31 март куни Қирғизистон, Тожикистон ва Ўзбекистон президентлари иштирокида тарихда илк бор уч томонлама саммит бўлиб ўтади. Бу ҳақда Қирғизистон Вазирлар Маҳкамаси раиси ўринбосари Эдил Байсалов Женевада БМТ Инсон ҳуқуқлари бўйича кенгашининг 58-сессиясида маълум қилди.
Байсалов ўз нутқида Қирғизистон ва Тожикистон ўртасидаги давлат чегараси чизиғи узил-кесил келишилганини айтди ва бу воқеани “дипломатия ва сиёсий ироданинг тарихий ғалабаси” деб атади. У эришилган келишув Қирғизистон президенти Садир Жапаровнинг “минтақада тинчлик ва барқарорликни таъминлаш йўлидаги тинимсиз саъй-ҳаракатлари” туфайли амалга ошганини таъкидлади.
Бўлажак Хўжанд саммити уч мамлакат ўртасидаги минтақавий ҳамкорликни мустаҳкамлашда муҳим қадам бўлади. Етакчилар Марказий Осиёда хавфсизлик, барқарорлик ва фаровонликни таъминлашга қаратилган ҳамкорликнинг асосий масалаларини муҳокама қилиши кутилмоқда.
21 февраль куни Қирғизистон ва Тожикистон қирғиз-тожик чегарасини делимитация қилиш бўйича якуний протоколни имзолади.
Бир қатор ҳужжатлар, жумладан, давлат чегараси тўғрисидаги шартнома, энергетика объектлари ва сув ресурслари бўйича ҳукуматлар ўртасидаги келишув, чорраҳалардаги автомобиль йўлларидан фойдаланиш ва янги йўллар қуриш тўғрисидаги битим тайёрланди. Ҳужжатлар икки мамлакат президентлари томонидан имзоланиши кутилмоқда.
