Руминияда президентлик сайловининг биринчи босқичи ғолиби Кэлин Жоржеску қўлга олинди. Натижалар бекор қилингач, Жоржеску президентликка ўз номзодини қайта кўрсатиш ниятида эканини билдирган.
Маҳаллий телеканаллар маълумотига кўра, 26 февраль куни эрталаб Жоржескунинг тарафдорлари уйларида фашистик ёки ирқчилик ташкилот тузиш иши бўйича тергов доирасида тинтув ўтказилган. Президентликка номзод ушбу иш бўйича гумонланувчи сифатида тергов қилинмоқда.
2024 йил ноябрда Кэлин Жоржеску президентлик сайловининг биринчи босқичида 23% овоз тўплаб, ғолиб бўлган. Аммо мамлакат Конституциявий суди сайлов натижаларини бекор қилиб, янги сана белгилаган. Руминия махсус хизматлари томонидан эълон қилинган Жоржескунинг сайловолди кампаниясига оид ҳужжатларда, Руминия Россиянинг “агрессив ҳаракатлари”га учрагани иддао қилинган. Жоржеску эса Россия билан алоқаларини рад этиб келмоқда.
