Аввалроқ, Жиззах вилоятида Cobalt ҳайдовчиси йўлнинг белгиланган жойидан кесиб ўтаётган 13 ва 4 ёшли опа-сингилларни уриб кетгани ҳақида хабар берилган эди. Мазкур ЙТҲни содир этиб, опа-сингилларнинг ўлимига сабаб бўлган ҳайдовчи қамалди. Бу ҳақда Ички ишлар вазирлиги маълумот берди.
Маълум қилинишича, ҳодиса 2024 йилнинг 18 ноябрь куни соат 19:30 атрофида Жиззах вилояти Бахмал туманида содир бўлган. Спиртли ичимлик таъсирида бўлган 1991 йилда туғилган А.О. Cobalt русумли автомашинасида “Ўсмат” йўналиши бўйича ҳаракатланиб келаётган пайтида йўлнинг белгиланган жойидан кесиб ўтаётган вояга етмаган пиёдалар – 2011 йилда туғилган И.М. ва унинг синглиси 2020 йилда туғилган И.К.ларни уриб кетиб, ҳодиса жойидан яширинган.
ЙТҲ оқибатида опа-сингиллар оғир тан жароҳатлари олиб, воқеа жойида вафот этган.
Мазкур ҳолат юзасидан суд иши Бахмал туман судида кўриб чиқилди. Суд ҳукмига кўра, ҳайдовчи 3 йил муддатга автотранспорт воситаларини бошқариш ҳуқуқидан маҳрум этилди ва унга нисбатан 9,5 йиллик озодликдан маҳрум қилиш жазоси тайинланди. Шунингдек, жабрланувчининг қонуний фойдасига 145 млн сўм миқдорида маънавий ва моддий зарар тўлаш мажбурияти юклатилди.
