Тошкентда белгиланмаган жойларга чиқинди ташлаётган қоидабузарларга қарши кенг кўламли рейдлар ўтказилмоқда. Бу ҳақда пойтахт ҳокимлиги матбуот хизмати хабар берди.
Қайд этилишича, ҳокимлик шаҳарликлар мурожаатларини диққат билан тинглаб, пойтахтда тозаликни сақлаш учун қатъий чоралар кўрмоқда.
Ҳуқуқ-тартибот органлари билан ҳамкорликда белгиланмаган жойларга чиқинди ташлаётган қоидабузарларга қарши оммавий рейдлар ўтказилмоқда. Уларга нисбатан амалдаги маъмурий жавобгарлик тўғрисидаги қонунларга мувофиқ жазо чоралари қўлланилади.
Қоидабузарларга Маъмурий жавобгарлик кодексига мувофиқ жарима солинмоқда. Кодекснинг 91−1-моддасига кўра, (Белгиланмаган жойларга қаттиқ маиший чиқиндиларни ва қурилиш чиқиндиларини ташлаш, шунингдек суюқ маиший чиқиндиларни тўкиш) бундай қоидабузарлик фуқароларга базавий ҳисоблаш миқдорининг 1 бараваридан 3 бараваригача (375 минг сўмдан 1 миллион 125 минг сўмгача), такроран содир этилганда эса 5 бараваридан 10 бараваригача (1 миллион 875 минг сўмдан 3 миллион 750 минг сўмгача) миқдорда жарима солишга сабаб бўлади.
“Шаҳарда тозалик ва тартиб ҳар бир фуқаронинг масъулиятидир. Биз аҳолини қоидаларга риоя қилишга, атроф-муҳитни ҳурмат қилишга ва она шаҳрининг ифлосланишига йўл қўймасликка чақирамиз. Тошкент – барчамизнинг умумий уйимиз. Уни биргаликда тозароқ қилайлик!” дейилади хабарда.
