Навоий вилояти Нурота туманидаги айрим мактабгача таълим муассасаларида гўшт маҳсулотларининг 4/1 қисми яроқсиз ҳолатда экани аниқланди. Бу ҳақда Истеъмолчилар ҳуқуқларини ҳимоя қилиш жамиятлари федерацияси хабар берди.
Билдирилишича, тумандаги умумий ўрта таълим мактаблари ва мактабгача таълим муассасаларида яратилган шарт-шароитлар ҳамда ўқувчилар ва тарбияланувчиларнинг соғлом овқатланиши ташкил этилишининг ҳолати жамоатчилик назорати тартибида ўрганилган. Мазкур тадбир давомида мактаб ва боғчаларда таълим сифати, моддий-техник база, санитария-гигиена талабларига риоя этилиши, овқатланиш сифати ва бошқа муҳим масалалар атрофлича таҳлил қилинган.
Ўрганишлар натижасида, айрим мактабгача таълим муассасаларида болалар учун ажратилган озиқ-овқат маҳсулотларининг сақланиш қоидаларига риоя қилинмаётгани аниқланган. Хусусан, айрим ташкилотларда гўшт маҳсулотларининг 4/1 қисми яроқсиз ҳолатда экани қайд этилган.
“Ўрганиш ишлари давом этмоқда, ўрганиш якунлари ва аниқланган камчиликлар бўйича тегишли ташкилотларга расман маълумот тақдим этилади”, дейилади хабарда.
