Кеча, 25 март куни тушдан кейин Франциянинг Сен-Дизье шаҳри яқинида Patrul France’нинг иккита Alpha Jet самолёти ҳалокатга учради. Бу ҳақда мамлакат Мудофаа вазири Себастьян Лекорню ўзининг X саҳифасида эълон қилди.
Франция ҳарбий-ҳаво ва коинот кучлари томонидан AFP агентлигига берилган маълумотга кўра, икки самолёт маҳаллий вақт билан соат 15:35 да Сен-Дизье шаҳридаги 113-ҳаво базаси яқинида тўқнашиб кетган. Учувчиларнинг иккаласи ва бир нафар йўловчи ўз вақтида катапультация қилиб, тирик қолган.
Маълумотларга кўра, улар нисбатан оғир аҳволда, икки нафари шифохонага олиб кетилган. Учинчи жабрланувчи эса кўп жойидан жароҳат олган (политравма) бўлиб, ҳарбий шифокорлар назоратига олинган.
Тўқнашув оқибатида самолётлардан бири силос ичига қулаган ва ёнғин келиб чиққан. Дастлабки хабарларга кўра, ҳеч қандай фуқаро жабрланмаган. Ҳодиса жойига ўт ўчирувчилар, тез ёрдам ходимлари ва полиция етиб борган.
Мудофаа вазири Себастьян Лекорню “Ички ишлар вазирлиги ва Мудофаа вазирлиги ўртасида тўлиқ мувофиқлаштириш амалга оширилаётганини” таъкидлаган.
Шунингдек, мамлакатда қуруқлик ва ҳавода қидирув ва қутқарув ишларини йўлга қўядиган SATER режаси (Sauvetage Aéro-Terrestre) ишга туширилган.
Маълумот учун, Alpha Jet француз компанияси Dassault ва Германиянинг Dornier компанияси томонидан биргаликда ишлаб чиқилган. Бу енгил ҳужумчи самолёт бўлиб, у ўқув самолёти сифатида ҳам ишлатилади.
