Гагаузия раҳбари Путиндан ёрдам сўраяпти
Гагаузиянинг россияпараст раҳбари Евгения Гуцул Россия Президенти Путинга уни озод қилиш ва "сиёсий тазйиқларни тўхтатиш" бўйича ёрдам кўрсатишни сўраб мактуб йўллади.
"Ҳеч қачон тарихий дўстларига хиёнат қилмаган гагауз халқи номидан, муҳтарам Владимир Владимирович, Сизга мурожаат қиламиз: дипломатик, сиёсий ва ҳуқуқий механизмларнинг бутун арсеналидан фойдаланиб, Молдова ҳукуматига босим ўтказиш орқали сиёсий тазйиқларни зудлик билан тўхтатиш ва мени тезроқ озод қилиш чораларини кўришингизни сўраймиз. Шунингдек, Гагауз автономиясининг мустақил Молдова доирасидаги махсус мақомини қатъий ва аниқ қўллаб-қувватлашингизни сўраймиз", — дейилади мактубда.
Эслатиб ўтамиз, кеча Гагаузия пойтахти Комрат шаҳрида автономия раҳбари Гуцулнинг қўлга олиниши муносабати билан тинч норозилик намойиши бўлиб ўтди. Намойишчилар «Гуцулнинг тақдири – Гагаузиянинг тақдири», «Озодлик» каби шиорларни қичқиришган. Шунингдек, намойиш иштирокчилари Россия ва Туркиядан Гагаузияни Молдова Президенти Сандунинг босимидан ҳимоя қилишни сўрашган.
Гуцул кечаси Кишинёв аэропортида Истанбулга учиб кетишга тайёрланаётган вақтда қўлга олиниб, 72 соатга ҳибсга олинган эди. У «сайлов кампаниясини ноқонуний молиялаштириш»да айбланмоқда. Молдова прокуратураси уни 30 кунга ҳибсга олиш бўйича судга мурожаат қилишга тайёргарлик кўрмоқда.
Эслатиб ўтамиз, Молодова биринчи марта сепаратизм муаммосига дуч келаётгани йўқ. 1992 йилда ҳам Россия ҳудуддаги сепаратизм кайфиятининг кучайиши ва қуролли тўқнашувлардан фойдаланиб, бу ҳудудга қўшин киритган эди. Айнан Москва дунё давлатлари ҳамда БМТ тан олмаган Преднестровье Молдава Республикаси тузилишига ёрдам берган, амалда бу минтақа устидан назорат ўрнатган эди.
Экспертларнинг хавотир олишича, Гагаузия билан боғлиқ кескинлик кучайса, Москва яна яна шундай тактика қўллашга уриниши мумкин.
Абдуллоҳ Саййид
