Қорақалпоғистон Республикаси Нукус шаҳрида 1,8 млрд сўмлик табиий газдан ноқонуний фойдаланган МЧЖнинг масъул шахслари қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти ахборот хизмати маълум қилди.
Қайд этилишича, Нукус шаҳрида департаментнинг Қорақалпоғистон Республикаси бошқармаси ходимлари томонидан терговга қадар текширув ўтказилган.
Текширувда Нукус шаҳрида фаолият юритувчи “Д.С.” МЧЖ масъул шахслари қурилиши тугалланмаган кўп қаватли бинода газ тармоғига тўғридан-тўғри уланиб, 1,8 млрд сўмлик табиий газдан ноқонуний фойдаланганликлари аниқланган.
“Мазкур ҳолат юзасидан Жиноят кодексининг 169-моддаси (ўғрилик) билан жиноят иши қўзғатилиб, тергов ҳаракатлари ўтказилмоқда”, — дейилади хабарда.
