Сурхондарё вилоятининг Узун туманида 42 ёшли аёл ва унинг боласи ўлдирилиб кетилгани, уйи эса ёқиб юборилгани ҳақида хабар берилганди. Мазкур иш доирасида терговга жалб қилинган 50 ёшли фермер Тоҳиржон Ҳайитов ўлик ҳолда оиласига топширилган.
Мазкур ҳолат юзасидан якуний маълумот берган Олий Мажлиснинг Инсон ҳуқуқлари бўйича вакили (Омбудсман)га кўра, фуқаро Тоҳиржон Ҳайитовнинг жорий йилнинг 25 февраль куни Сариосиё тумани тиббиёт бирлашмасида вафот этгани ҳолати юзасидан туман прокуратураси томонидан терговга қадар текширув ҳаракатлари якунланган.
Суд-тиббий экспертизасининг жорий йилнинг 17 март кунидаги хулосасига кўра, Тоҳиржон Ҳайитовнинг ўлимига гипертония касаллиги сабабли юрак ўнг қоринча олд деворида мавжуд бўлган кардиосклероз ўчоқ соҳасидан ёрилиши, юрак тампонадаси, яъни юрак халтасининг қон ва қон лахталари билан тўлиши ва юракнинг юрак халтасида сиқилиши оқибатида келиб чиққан. Шунингдек, хулосада марҳумнинг танасида тан жароҳатлари ва унинг қолдирган излари йўқлиги кўрсатилган.
Текширув натижасига кўра, мазкур ҳолатда бирор-бир шахснинг ҳаракатида жиноят таркиби аниқланмагани сабабли жорий йилнинг 25 март куни Жиноят процессул кодекснинг 83-моддаси (Реабилитация учун асослар) 2-бандига асосан жиноят иши қўзғатишни рад қилиш ҳақида қарор қабул қилинган.
