Истиқболли лойиҳалар миллий агентлиги иқтисодчи ва блогер Отабек Бакиров устидан ИИББга шикоят қилди. Бу ҳақда Бакиров ўзининг ижтимоий тармоқлардаги саҳифасида маълум қилди.
“Истиқболли лойиҳалар миллий агентлиги “ТЕМУ” платформасининг тақиқланишига муносабат тарзида ёзилган "Қонунсиз суперрегулятор" постида агентликни обрўсизлантиришга уриниш бўлган деб топиб устимдан ИИББга шикоят киритган”, — дея ёзади иқтисодчи.
Шунингдек, Бакиров мазкур шикоятни Агентлик раҳбарининг биринчи ўринбосари В. Пак имзолаганлигига тўхталиб, шикоятга Агентлик ишончли вакилининг тушунтириш хати илова қилинганини қўшимча қилган.
“Ариза ҳозирда пойтахт ИИБ Киберхавфсизлик бўлинмаси томонидан ўрганилмоқда. Кеча оқшом чақирув бўйича терговга дастлабки тушунтиришларни ёзма ва оғзаки тарзда тақдим этдим (иш бўйича ҳужжатлардан нусха ҳали берилмади)”,— дейди у.
Маълумот учун, Бакиров томонидан ёзилган "Қонунсиз суперрегулятор" пости ТЕМУ электрон савдо платформаси фаолиятини чеклаш қарори эълон қилинган куни (2025 йил 4 март) ёзилган.
