Қўшма Штатлар президенти Дональд Трамп Украинага оид фойдали қазилмалар бўйича мамлакат етакчиси билан битим имзолаши мумкинлигини айтди. Бу ҳақда “DW” нашри маълум қилди.
Қайд этилишича, Трамп буни 2025 йилнинг 17 апрель куни Оқ уйда Италия бош вазири Жоржа Мелони билан учрашувида айтган. Шунингдек, АҚШ етакчиси мазкур битим 24 апрель куни имзоланиши мумкинлигини қўшимча қилган.
Шунингдек, учрашувда қатнашган АҚШ молия вазири Скотт Бессент эса, битим тафсилотлари ҳали муҳокама қилинаётганини айтиб, имзоланиши мумкин бўлган санани 26 апрель деб айтмоқда.
Бундан ташқари, Украина иқтисодиёт вазири Юлия Свириденко ҳам Киев ва Вашингтон ўртасида камёб ер элементлари ва бошқа фойдали қазилмалар бўйича “битим тузиш нияти борлигини тасдиқловчи меморандум” имзоланганини маълум қилган.
Унга кўра, келгусида битим матнини якунлаш, уни имзолаш ва Украина ҳамда АҚШ парламентларида ратификация қилиш режалаштирилган.
