Бугун, 28 апрель куни Тошкент шаҳрининг Миробод туманида жойлашган қурилиш маҳсулотлари сақланаётган омборхонада ёнғин юз берди. Бу ҳақда Фавқулодда вазиятлар вазирлиги ахборот хизмати маълум қилди.
Қайд этилишича, ҳолат эрталаб соат 07:00 да туманнинг “Абдурауф Фитрат” МФЙ, Г.Алиев кўчасида жойлашган қурилиш маҳсулотлари сақланаётган омборхоналарнинг бирида содир бўлган.
Шунга кўра, ёнғин-қутқарув экипажлари соат 07:02 да ҳодиса жойига етиб бориб, ёнғин соат 08:33 да ўчирилган.
Ёнғин оқибатида омборхонанинг тахминан 500 кв.м майдонда ички ва том қисми ёниб зарарланган.Ёнғинни бартараф этишга 12 та ёнғин-қутқарув экипажи жалб этилган, — дейилади хабарда.
Ҳозирда ёнғин сабаби ва моддий зарар миқдори аниқланмоқда. Ёнғин оқибатида тан-жароҳати олганлар йўқ.
