Кеча, 27 апрель куни Туркия Ҳарбий-ҳаво кучларининг ҳарбий транспорт самолётлари Покистонга йўл олди. Бу ҳақда “The Daily Guardian” хабар берди.
Ҳиндистон ва Покистон ўртасида кескинлик кучайган бир пайтда Туркиянинг бир неча ҳарбий транспорт самолётлари Покистонга жўнатилди. Уларнинг парвози “Flightradar” хизмати томонидан қайд этилган.
Покистонлик манбалар Туркия Ҳарбий-ҳаво кучларининг 6 та С-130 ҳарбий-транспорт самолёти Исломободдаги ҳарбий базага қўнганини даъво қилмоқда.
Ҳиндистон ва Покистон ўртасидаги можаро Кашмирда 26 кишининг ҳаётига зомин бўлган теракт ортидан авж олди. 22 апрель куни бир гуруҳ қуролланган жангарилар сайёҳларга ҳужум қилган.
Ҳиндистон ҳукумати фожиа ортида расмий Исломобод турганини иддао қилмоқда. Ҳиндистон дипломатлари мамлакатдан чақириб олинди ва чегарада мунтазам отишмалар бошланди.
Покистон Ҳиндистон билан чегарага ҳарбий техникани кўчиришни бошлади: Ҳиндистон чегарасидан 80 км узоқликда Ҳақиқий назорат чизиғи томон Покистон армиясининг ўнлаб SH-15 155 мм ўзиюрар қуроллари аниқланди.
