Андижонда эркак электр тармоғига ўзбошимчалик билан уланиб, 213 миллион сўмлик электр энергиясини ўғирлагани аниқланди
Андижон вилоятининг Булоқбоши туманида яшовчи фуқаро И.Ф. отасига тегишли нотурар жойда қурилиш моллари ишлаб чиқариладиган цех ташкил этган. У цехни электр тармоғига рухсатсиз улаб, ноқонуний фойдаланиб келгани аниқланган.
Расмий маълумотларга кўра, бу ҳолат оқибатида 213 миллион сўмлик электр энергияси талон-торож қилинган.
Мазкур ҳолат юзасидан фуқаро И.Ф.га нисбатан Жиноят кодексининг 169-моддаси 4-қисми “а” банди (ўта йирик миқдорда ўғрилик) билан жиноят иши қўзғатилди. Суд қарорига кўра, унга нисбатан қамоққа олиш эҳтиёт чораси қўлланилган.
Расмийлар барча тадбиркор ва фуқаролардан энергия ресурсларидан қонуний ва оқилона фойдаланишни сўрамоқда.
Ҳуқуқни муҳофаза қилувчи органлар томонидан газ ва электр энергиясидан ноқонуний фойдаланиш ҳолатларини аниқлаш бўйича рейд тадбирлари давом этмоқда.
