Чуст, Хўжаобод ва Олтинкўл туманларида энергия ресурсларидан ноқонуний фойдаланганлик ҳолатлари аниқланди. Бу ҳақда Энергетика вазирлигининг матбуот хизмати маълум қилди.
Қайд этилишича, Чуст туманида “А.Т.” МЧЖ раҳбари А.Т. чорвачиликка мослашган биносида тижорат мақсадида электр тармоғига ўзбошимчалик билан уланиб, 481,5 млн сўмлик электр энергиясидан ноқонуний фойдаланганлиги аниқланган.
Шу каби Хўжаобод туманида “Б.Ч.” хусусий корхонаси масъул шахслари “Жаҳонобод” МФЙ ҳудудидаги умумий овқатланиш шохобчасида газ тармоғига ўзбошимчалик билан уланиб, 317,9 млн сўмлик табиий газдан ноқонуний фойдаланганликлари фош этилди.
Олтинкўл туманида эса “П.Н.” МЧЖ раҳбари Н.Р. “Жалабек” МФЙ ҳудудидаги автомобилларга ёқилғи қуйиш шохобчасида электр тармоғига ўзбошимчалик билан тўғридан-тўғри уланиб, 154,1 млн сўмлик электр энергиясидан ноқонуний фойдаланганлиги аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
