Россияда “Гарри Поттер” ва бошқа машҳур фильм ва сериаллар тақиқланади.
Россияда "Тахтлар ўйини", "Гарри Поттер", "Катта шаҳарда секс" ҳамда “Қоғоз уй” (Cardhouse) фильм ҳамда сериаллари чайлдфри (бола кўришни истамаслик) ғоясини тарғиб қилгани учун тақиқланиши мумкин.
Россия парламентининг нашри "Парламентская газета" шу ҳақда хабар бермоқда.
Россия Маданият вазирлиги энди бола туғилишидан воз кечиш (чайлдфри) ғоясини тарғиб қиладиган фильмларга прокат рухсатномаси бермайди. Мазкур вазирлик буйруғи 15 май куни ҳуқуқий маълумотлар порталидан эълон қилинди.
Ўзгартиришлар Россия Маданият вазирлигининг фильмга прокат рухсатномаси бериш тартиби тўғрисидаги буйруқнинг 19-бандининг “в” кичик-бандига киритилади.
Ҳозирги кунда прокат рухсатномалари порнография, зўравонлик ва шафқатсизлик, нотрадиционал жинсий ҳаёт, жинсни алмаштириш ғояларини тарғиб қиладиган фильмларга берилмайди.
Буйруқ 2025 йил 1 сентябрдан кучга киради ва 2030 йил 1 сентябргача амал қилади.
Маълумки, 2024 йил декабридан Россияда оммавий ахборот воситаларида, интернетда, фильмларда ва рекламада онгли равишда бола туғилишидан воз кечиш ғоясини тарғиб қилиш тақиқланган қонуни кучга кирган эди.
Россияда амалдаги қонунчилик “чайлдфри” ғоясини оммавий тарғиб қилганларни жаримага тортишни кўзда тутади. Бу ҳуқуқбузарликка йўл қўйган мансабдор шахсларга — 200 минг рублгача, юридик шахсларга — 1 миллион рублгача жарима белгиланган. МЧЖлар учун фаолиятини эса 90 кунга тўхтатиш жавобгарлиги ҳам назарда тутилган. Агар мазкур ғоялар балоғатга етмаганлар орасида ОАВ ёки интернет орқали тарқалса, жисмоний шахсларга — 400 минг рублгача, мансабдорлар ва юридик шахсларга — мутаносиб равишда 800 минг ва 5 миллион рублгача жарима қўлланилади.
Эслатиб ўтамиз, "Парламентская газета" аввалроқ Россияда маънавий-ахлоқий қадриятлар луғати — давлат идоралари ва жамоат ташкилотлари фаолиятини мувофиқлаштиришга ёрдам берадиган — тайёрланишини хабар қилган эди.
Абдуллоҳ Саййид
