Хоразм вилояти Янгиариқ тумани давлат солиқ инспекцияси ҳодими трикотаж маҳсулотлари ишлаб чиқариш ва савдоси билан шуғулланувчи хусусий корхонанинг солиқ қарзини ундирмасдан, банкрот деб топилишига кўмаклашиш эвазига 900 АҚШ доллари пора олган пайтда ашёвий далиллар билан ушланган. Бу ҳақда darakchi.uz га ДХХ матбуот хизмати хабар берди.
Унга нисбатан Жиноят кодексининг 168-моддаси 3-қисми "в" банди билан жиноят иши қўзғатилиб, тергов ҳаракатлари олиб борилмоқда.
Қашқадарё вилояти Яккабоғ туманида эса муқаддам судланган шахс чорвачиликка ихтисослашган фермер хўжалигига сув таъминотига ноқонуний уланиш ҳолатини ёпиб бериш эвазига фермердан 1500 АҚШ доллари олган пайтда қўлга олинди.
Шу ишда Республика суд-экспертиза марказининг Қашқадарё вилояти бўлинмаси эксперти ҳам иштирок этгани аниқланди — у мазкур маблағни олган пайтда ашёвий далиллар билан ушланган.
Икки ҳолат юзасидан ҳам Жиноят кодексининг 168-моддаси 3-қисми "в" банди, шунингдек 28 ва 211-моддалари асосида жиноят иши қўзғатилиб, тергов ишлари давом этмоқда.
