Қашқадарё ва Хоразмда икки нафар мансабдор пора эвазига фуқароларни ишга киритишини ваъда қилиб, улардан пул олаётганда қўлга тушди. Бу ҳақда ДХХ “Darakchi.uz”га маълум қилди.
Тошкент шаҳар Адлия бошқармасида алоқа оператори бўлиб ишлаган, 1992 йилда туғилган шахс Хоразм вилоятидаги фуқарони ўзининг “мансабдор танишлари” орқали ички ишлар органларига ишга киритишни ваъда қилган. У лавозим турига қараб нарх ҳам белгилаган — аскарлар учун 1500, офицерлар учун эса 2000 АҚШ доллари талаб қилган.
Давлат хавфсизлик хизмати Хоразм вилояти бошқармаси, Бош прокуратура ҳузуридаги Департамент ва ИИО билан ҳамкорликда ўтказилган тезкор тадбирда у воситачи орқали 1900 АҚШ доллари ва 1 млн 295 минг сўм олган пайтида ушланган.
Қашқадарё вилоятида эса Миллий гвардиянинг Қарши шаҳар бўлими ходими Косон туманидаги фуқарони вилоят ИИБга ишга киритиш эвазига 2000 доллар олган вақтда ушланган.
Ҳар икки ҳолат юзасидан мазкур шахсларга нисбатан Жиноят кодексининг 168-моддаси (фирибгарлик) ва 28,211-моддаси (пора бериш) билан жиноят иши қўзғатилиб, тергов ҳаракатлари олиб борилмоқда.
