Германияда халқаро талабалар Гарвард университетида таҳсил олиш имкониятига эга бўлиши мумкин. Бундай таклифни Германия Федератив Республикасининг маданият вазири Вольфрам Ваймер илгари сурди.
Унинг сўзларига кўра, нуфузли АҚШ университети мамлакат ҳудудида “сургундаги кампус” ташкил этиши мумкин.
Бу таклиф АҚШда Доналд Трамп маъмурияти томонидан хорижий талабаларни Гарвардга қабул қилиш тақиқлангач илгари сурилган. Вазир Германиянинг сўз ва матбуот эркинлиги, сифатли таълим ва очиқлик тамойилларига содиқ эканини таъкидлади.
“Биз санъат ва сўз эркинлигига, очиқ муҳокама ва хилма-хилликка ишонамиз. Гарвард ва бошқа Америка университетларининг талабалари Германияда мамнуният билан кутиб олинади”, — дейди Ваймер Bloomberg нашрига берган интервьюсида.
