"Luxiders" халқаро журналида "Лондонда Марказий Осиё модасининг қайта тикланиши" сарлавҳали мақола чоп этилди, деб хабар қилмоқда "Дунё"АА.
Мақолада қайд этилишича, сўнгги йилларда Марказий Осиё либослар дизайнерлиги сезиларли ютуқларга эришмоқда. Хусусан, бетакрор ранглар, нафис матолар ва кўп асрлик ҳунармандчилик анъаналари билан минтақа дизайнерлари Британия пойтахтига маданий меросга асосланган, аммо замонавий услубга эга бўлган янгича либосларни олиб кирмоқда.
"Лондонда тошкентлик ижодкорлар сони тобора ортиб бормоқда. Улар она юртларининг миллий маданиятини замонавий мода аудиториясига манзур бўладиган усулдаги либосларга кўчирмоқда. Жумладан, тошкентлик дизайнер Камола Рустамованинг ижоди бу уйғунликнинг ёрқин намунасидир",– деб таъкидланган нашрда.
Қайд этилишича, Камоланинг "Azkuar Moreno" номи остидаги бренди ўзбек миллий либосларини испан костюми элементлари билан уйғунлаштирди. "Ўйлаб кўринг, икат матолари қайта ишланган фламенко либослари ёки енглари билан тикилган курткалар қанчалар чиройли ва бежирим кўринади. Натижада бир вақтнинг ўзида глобал ва бетакрор тўплам пайдо бўлди", – деб ёзади муаллиф.
Мақолада таъкидланишича, Камола Рустамованинг Ўзбекистондаги студиясига лондонлик мижозлари тез-тез ташриф буюради. Уларнинг аксарияти дизайнернинг ижод маҳсулларини ўзлари кийган энг ажойиб либослар сифатида эътироф этади. Бу мақтовлар Камола яратган янги либослар дизайнларининг нақадар ўзига хослиги ва мода ихлосмандлари орасида анчайин машҳур эканлигини кўрсатади. Шунингдек, нафислик ва тарихни хуш кўрадиган лондонликлар учун ўзбекча чопон ва атласдан яратилган либослар бу мавсумнинг энг катта мода тенденцияси бўлиши кутилмоқда.
"Кийиниш ҳам маданият билан чамбарчас боғлиқ ва бу жиҳат кишини илҳомлантиради. Айниқса анъанавий услуб замон билан уйғунлашганда", – дея Комала Рустамова сўзларидан иқтибос келтирилган нашрда.
Мақола якунида "Тошкент, Бишкек ва Олмаота каби шаҳарларда етишиб чиқаётган янги авлод дизайнерлари ўзларининг бетакрор ижод намуналари билан жаҳон мода оламининг янги тенденцияларини яратишда улкан ҳисса қўшмоқда", – деган сўзлар билан якунланган.
