Россия Хавфсизлик кенгаши котиби Сергей Шойгу кеча, 4 июнь куни Шимолий Кореяга борди ва у ерда мамлакат раҳбари Ким Чен Ин билан учрашди. Бу ҳақда Россия Хавфсизлик кенгаши сайтида хабар берилди.
Учрашув чоғида Ким Чен Ин КХДР Россияни Украинадаги урушда ҳам қатъий қўллаб-қувватлашда давом этишини билдирган.
“КХДР ҳукумати Россиянинг позицияси ва ташқи сиёсатини барча жиддий халқаро сиёсий масалаларда, айниқса Украинадаги можарода шартсиз қўллаб-қувватлайди”, деган Шимолий Корея раҳбари.
Украина уруши ҳақида гапирар экан, Ким Чен Ин Россияга “адолатли урушда доимий ғалабаларни” тилаган.
Қайд этилишича, томонлар учрашув чоғида Курск вилоятида бўлиб ўтган жангларни ҳам муҳокама қилган. Ушбу жангларда Шимолий Корея аскарлари Украина Қуролли кучларига қарши Россия томонида туриб жанг қилган.
Россия Хавфсизлик кенгаши “кореялик жангчиларнинг жасоратини абадийлаштириш” масаласи муҳокама қилинганини билдирган.
Маълумот учун, 2024 йилнинг 19 июнида Владимир Путин Пхеньянга қилган ташрифи чоғида стратегик ҳамкорлик тўғрисидаги шартнома имзоланган. Ушбу битимга кўра, ҳар икки давлат бошқа давлат томонидан қуролли ҳужумга учраган тақдирда бир-бирига ҳарбий ва бошқа шаклларда ёрдам кўрсатишга мажбур.
