Ўзбекистон Республикаси Президенти Шавкат Мирзиёев миллий терма жамоамизни Жаҳон чемпионатига илк бор йўлланма олгани билан самимий табриклаб, бу улкан зафарни бутун халқимиз учун унутилмас тарихий ғалаба сифатида эътироф этди.
"Сизлар Ватанимиз тарихида биринчи марта жаҳон чемпионати йўлланмасини қўлга киритиб, халқимизнинг неча йиллик орзусини рўёбга чиқардингиз!", – деди Президент ўз табригида.
Унинг таъкидлашича, ушбу зафар бутун мамлакатимизда футболга қаратилаётган эътибор ва ёшларимизнинг ғайрат-ижоди самарасидир. Президент терма жамоа аъзоларини, мураббийларни, ота-оналарни ва барча яқинларини чин қалбдан табриклади.
"Сизларнинг ғалабангиз – Янги Ўзбекистон ёшларининг юксак иродаси ва келажакка ишончининг ифодасидир."
Шунингдек, у жамоамизни АҚШ, Мексика ва Канадада бўлиб ўтадиган жаҳон чемпионатида Марказий Осиё шарафини муносиб ҳимоя қилишга чақирди.
"Сизлар олиб келган ушбу ғалаба – Қурбон ҳайити кунларида халқимизга энг гўзал байрам туҳфасидир!", – дея сўзини якунлади Президент.
