Россия Федерацияси ҳуқуқни муҳофаза қилувчи органлари (ОМОН) томонидан ушбу давлатда вақтинча меҳнат фаолиятини олиб бораётган хориж фуқароларига нисбатан жисмоний куч қўллангани акс этган хабарлар ижтимоий тармоқларда муҳокамаларга сабаб бўлмоқда.
Ўзбекистон Республикаси Москва шаҳридаги Бош консулхонаси ва Миграция агентлигининг Россия Федерациясидаги ваколатхонаси ушбу масалани назоратга олган.
Ҳолат 2025 йил 8 июнь куни Москва шаҳри Сокольники туманида ўтказилган текширув тадбирлари чоғида содир бўлган.
Қайд этилишича, айни пайтда мазкур ҳолат юзасидан Россия Федерациясининг ҳуқуқни муҳофаза қилувчи органларидан расмий маълумот кутилмоқда.
Маълумотларга кўра, рейд якунида ҳужжатларида муаммо аниқланган 5–6 нафар шахс ушлаб қолиниб, ҳолатни аниқлаш мақсадида ички ишлар бўлимига олиб кетилган.
Агар ушбу вазиятда жабрланганлар орасида Ўзбекистон Республикаси фуқаролари мавжуд бўлса, жумладан, уларга тан жароҳатлари етказилган, ҳуқуқлари бузилган ёки бошқа муаммоларга дуч келган бўлсалар, ҳолат юзасидан Миграция агентлигининг Россия Федерациясидаги ваколатхонасига қуйидаги алоқа рақамлари орқали мурожаат қилишлари сўралади:
Телефон: +7 925 045-47-44
