Ижтимоий тармоқларда Андижон вилоятининг Асака тумани ҳокими Насибулло Мўминовнинг ҳамда Бухоро вилояти ҳокими Ботир Зариповнинг фуқароларни ҳақорат қилиб, улар билан жанжаллашгани ёзиб олинган овозли хабар ҳамда видео тасвир тарқалди.
Асака тумани ҳокими Насибулло Мўминовнинг овози ёзиб олинган хабарда у фуқарога мени кимлигимни билмайсанми? кўрсатиб қўяман сенга, деган гаплари тармоқларда кенг муҳокама қилинмоқда.
Ҳолатни эшитган, билган фуқаролар бунга ёмон фикр билдириб, қачон ҳокимлар қилган иши учун халқдан узр сўрайди? деб иддаолар қилмоқда.
Шунингдек, тармоқларда Бухоро вилояти ҳокими Ботир Зариповнинг чиқишлари ҳам кенг муҳокамаларга сабаб бўлмоқда.
Боғча ҳудудига кирганларнинг ҳаммасининг ҳуқуқий ҳужжатларини кўтарасан. Йўғини ҳеч кимни эшитмасдан бузасан. Мўмин. Суд-пуд демасдан бузиб ташлайсан. Бугуннинг ўзида бузиб ташлайсан. Нарсаси, ичидаги одами билан кўмиб ташлайсан. Бўлди энди, суд-пуд деб, ҳаммасини эркалатганимиз. Орқадан эшик очганнинг ҳужжатини кўрасан, – дейди ҳоким Ботир Зарипов.
Аммо мазкур ҳолатлар юзасидан ҳанузгача Асака тумани ҳокимлигидан ҳам Бухоро вилояти ҳокимлигидан ҳам садо чиқмади. Ижтимоий тармоқ фаоллари эса “сўконғич” ҳокимларнинг халқдан узр сўраши кераклиги ёзмоқда.
