Эрон ҳаво ҳудудининг ёпилиши муносабати билан бир нечта рейслар Тошкентдаги муқобил аэродромга йўналтирилди.Бу ҳақда Uzbekistan Airports матбуот хизмати хабар берди.
Қайд этилишича, Uzbekistan Airways авиакомпан иясининг Тошкент — Жидда йўналишидаги HY5343 рейси соат 6:18 да Тошкент аэропортига қайтиб қўнди. Fly Dubai компаниясининг Тошкент — Дубай йўналишидаги FZ1942 рейси эса маҳаллий вақт билан соат 6:37 да қўнди.
Centrum Air’нинг Тошкент — Доҳа йўналиши бўйича C63341 рейси учиш аэропортида кечиктирилди. Йўловчилар вақтинчалик терминалга жойлаштирилди.
Шунингдек, Air Cairo авиакомпаниясининг Олмаота — Шарм аш-Шайх йўналиши бўйича SM882 рейси (07:46) ва Qatar Airways авиакомпаниясининг Сеул — Доҳа йўналиши бўйича QR8985 рейси (07:57) Тошкент аэропортига фавқулодда қўнишни амалга оширди.
Uzbekistan Airports парвозлар ҳолати ҳақида батафсил маълумот олиш учун авиаташувчига мурожаат қилиш мумкинлигини эслатиб ўтди.
13 июнга ўтар кечаси Исроил кучлари "Эрон режимининг давом этаётган тажовузига жавоб" сифатида унинг бир қанча ҳарбий объектларига, жумладан, ядровий дастури билан боғлиқларига зарба берди. Нетаньяҳу "мисли кўрилмаган" ҳарбий операция бошланганини эълон қилди. Мамлакатнинг ҳаво ҳудуди ёпиқ. Эрон ҳам ўз ҳаво ҳудудини ёпган.
