Бухоро вилоятининг Ғиждувон туманида 4 туп каннабис ва 36 туп кўкнор гиёҳвандлик ўсимликларини парваришлаётган шахс қўлга олинди. Бу ҳақда вилоят божхона бошқармаси хабар берди.
Маълум қилинишича, бошқарманинг Контрабандага қарши курашиш бўлими, туман ИИБ ҳамда Миллий гвардия ходимлари ҳамкорлигида ўтказилган “Қорадори–2025” тезкор тадбири давомида ноқонуний гиёҳвандлик ўсимликларини етиштириш билан боғлиқ ҳолат фош этилган.
Олдиндан олинган маълумотлар асосида ўтказилган тадбирда Ғиждувон тумани Буликаён маҳалласида яшовчи фуқаронинг хонадони холислар иштирокида кўздан кечирилган. Натижада томорқада 4 туп каннабис ва 36 туп кўкнор гиёҳвандлик ўсимликлари парваришланаётгани, шунингдек, хўжалик хонасида оғирлиги 850 грамм бўлган қуритилган кўкнор ўсимлиги сақланаётгани аниқланган.
Мазкур ҳолат юзасидан божхона органлари томонидан тегишли ҳужжатлар расмийлаштирилиб, суриштирув ҳаракатлари олиб борилмоқда.
