Яқин Шарқдаги геосиёсий кескинлик яна авж олди: Исроил армияси Эрон ҳудудидаги стратегик объектларга навбатдаги зарбаларни берди. Теҳрон бу ҳужумларга жавобан халқаро ҳамжамиятга мурожаат қилмоқда.
2025 йил 14 июнь куни Исроил Мудофаа кучлари (ТсАХАЛ) Эроннинг бир қатор ҳарбий инфратузилмаларига зарба берганини эълон қилди. Хусусан, Теҳрон яқинидаги Меҳрабад аэропорти ва Исфаҳон вилоятидаги Мудофаа вазирлигига тегишли объектлар нишонга олинган. Бу ҳақда Исроил армиясининг расмий вакиллари ва маҳаллий манбалар хабар бермоқда.
Бундан ташқари, ТсАХАЛ вакили Авихай Эдри ижтимоий тармоқдаги баёнотида Исфаҳондаги ядро объектига ҳам зарба берилганини билдирган. Хавфсизлик бўйича халқаро назоратни амалга оширувчи МАГАТЕ 13 июнь кунги ҳужум оқибатида Исфаҳон ядро марказида айрим зарарлар юз берганини тасдиқлаган.
Эроннинг расмий ахборот агентликларига кўра, ҳужумлар натижасида Эрон Ислом Инқилоби Гвардияси (ИРГC)нинг етти нафар юқори лавозимли офицери ҳалок бўлган. Улар орасида ракета дастури ва дрон ишлаб чиқиш бўйича етакчи мутахассислар бўлган.
Исроил томонидан арабча ва форс тилида берилган баёнотда Эрон фуқароларига ҳарбий объектлар жойлашган ҳудудларни зудлик билан тарк этиш ва огоҳлантиришлар берилмагунча у ерга қайтмаслик тавсия этилган.
Эрон ташқи ишлар вазири Аббос Арағчий халқаро ҳамжамиятга мурожаат қилиб, агар Исроил томонидан ҳужумлар тўхтатилса, Эрон ҳам зарбаларни тўхтатишини билдирди. “Бу фақат ўзини ҳимоя қилишга қаратилган чора-тадбирлар”, — дея қайд этди у IRNA агентлигига берган интервьюсида.
Мазкур воқеалар фонида Исроил–Эрон ўртасидаги зиддият янги босқичга кўтарилиши мумкин. Таҳлилчилар бу ҳолат Яқин Шарқда ядро хавфсизлиги, минтақавий барқарорлик ва дипломатик диалогга бўлган эҳтиёжни яна бир бор кун тартибига олиб чиқишини таъкидламоқда.
