Ўзбекистонда йил якунигача 100 минг хонадон энергия самарадор тизимга ўтиши мумкин. Бу ҳақда Шавкат Мирзиёев 16 июнь куни йиғилишда маълум қилди.
Ёзнинг бошланиши нисбатан салқин келгани, лекин буёғига кунлар анча исиб, электр истеъмоли ошиши қайд этилди. Икки ой олдин Энергия самарадорлик агентлиги ташкил қилиниб, бюджетдан 100 миллиард сўм берилгани таъкидланди.
Энергетика вазирлиги ва агентликка вазирлик, ҳокимлик ва давлат корхоналарининг ойлик истеъмоли 500 киловатт соатдан юқори бўлган ходимлари рўйхатини шакллантиради. Ушбу ходимларга энергия самарадор технологияларга ўтиш учун "яшил таъмир" кредити ёки субсидия олишга кўмаклашилади. Керак бўлса, бюджетдан ташқари жамғармасидан ссуда берилиши мумкин.
Бунинг ҳисобидан йил якунигача истеъмоли юқори бўлган камида 100 минг хонадон энергия самарадор тизимга ўтиши зарурлиги кўрсатиб ўтилди.
