Республика ихтисослаштирилган урология илмий-амалий тиббиёт марказига давлат даволаш муассасалари орасида биринчи бўлиб замонавий робот-хирург қурилмаси олиб келинди. Бу ҳақда ССВ хабар бермоқда.
Шу муносабат билан ўтказилган тадбирда сўзга чиққанлар юртимиз соғлиқни сақлаш соҳасини ривожлантириш, замонавий технологияларни амалиётга кенг жорий этиш, бу орқали аҳолига кўрсатилаётган тиббий хизматлар сифатини янада оширишга алоҳида эътибор қаратилаётгани қайд этилди.
Таъкидлаш керак, “REVO-I” русумли ушбу ноёб робот-хирург Кореянинг “Meere” компаниясида ишлаб чиқарилган бўлиб, унинг имкониятлари жуда кенг.
Хусусан, мазкур қурилма ёрдамида бажариладиган амалиётлар бемор ҳаёти учун муҳим бўлган бошқа аъзоларга таъсир қилмаслиги, минимал қон йўқотиш билан кечиши ва операциядан кейинги реабилитация жараёни қисқа экани билан муҳим аҳамиятга эга.
