19 июн куни Х (собиқ Тwitter) ижтимоий тармоғида Тбилиси-Тошкент йўналишида учиши керак бўлган йўловчилардан бири парвоз билан боғлиқ муаммо ҳақида ёзиб, пост жойлади. Унинг айтишича, самолёт ярим соат аэропорт устида айланиб, рейсини амалга ошира олмаган.
“Самолёт аэропортдан кўтарилганда қаттиқ шовқин чиқди. Аэропорт устида 30 дақиқа айланиб, яна қайта қўндик. Пассажирлар қанот қисмида ёнғин ҳам кўришибди. Бизга Тошкентдан бошқа самолёт жўнатишар экан”, – деган у.
“Uzbekistan Airports” АЖнинг Kun.uz’га маълум қилишича, айни рейс Centrum Air авиакомпаниясига тегишли бўлган. Таҳририят мухбири бу ҳақда маълумот олиш учун авиакомпания маркетинг бўлими билан боғланди. Бўлим вакиллари ҳақиқатан техник носозлик кузатилганини, аммо самолёт қанотида ёнғин бўлмаганини таъкидлашди.
“Тбилиси – Тошкент йўналиши бўйича амалга оширилаётган C6222 рейси техник носозлик ҳақида тизим сигналини олганидан сўнг жўнаган аэропортига қайтди. Қўниш одатдаги тартибда амалга оширилди. Ҳозирда ҳаво кемаси техник диагностикадан ўтказилмоқда.
Йўловчиларни Тошкентга етказиш учун захира борт аллақачон йўлга чиқарилган. Centrum Air етказилган ноқулайликлар учун узр сўрайди ва кечикишларни камайтириш ҳамда парвозларни имкон қадар қулай ташкил этиш учун барча зарур чораларни кўрмоқда”, – дейилади авиакомпания Telegram саҳифасига жойланган изоҳда.
Маълумотларга кўра, C6222 Тбилиси – Тошкент рейси Ўзбекистон вақти билан тунги 3:00 да парвоз қилиб, эрталаб 7:00 да пойтахтга қўнган. Ҳозирча техник диагностика натижалари маълум эмас. Компания вакили бу ҳақдаги маълумот ошкор қилинмаслиги мумкинлигини айтди.
