Эрон парламенти стратегик аҳамиятга эга Ормуз бўғозини ёпиш масаласини маъқуллади. Бу ҳақда 22 июнь куни мамлакатнинг расмий телеканали “Press TV” хабар берди.
Қайд этилишича, бўғозни ёпиш бўйича якуний қарорни Эроннинг Олий миллий хавфсизлик кенгаши қабул қилиши керак. Яъни ҳозирча сўнгги нуқта қўйилмаган.
Маълумот учун, Ормуз бўғози – Эрон ва Уммон ўртасида жойлашган муҳим денгиз йўлаги бўлиб, у орқали дунё бўйича ташиладиган нефть ва газнинг қарийб 20 фоизи ўтади. Бўғознинг ёпилиши нафақат Яқин Шарқ, балки бутун дунё энергетика хавфсизлигига жиддий таҳдид солиши мумкин.
“Reuters” таҳлилчиси Рон Буссо бу вазиятга изоҳ берар экан, Теҳроннинг бундай ҳаракати АҚШ ҳарбий-денгиз кучлари томонидан дарҳол жавобга учрашини айтади. Унга кўра, агар Эрон бўғозни тўсишга уринса, глобал нефть оқимида қисқа муддатли узилишлар кузатилади, бироқ бу узоқ давом этмайди.
Аммо савол очиқ: бу ташаббус нимадан далолат? Эрон бу орқали босимни оширмоқчими? Ёки бу – АҚШ ва Исроилга нисбатан огоҳлантирувми?
Айни пайтда нефть бозорида кескинлик кучаймоқда. Экспертлар фикрича, вазият янада кескинлашса, нефть нархлари кескин кўтарилиши мумкин.
Бўғоз ҳали ёпилгани йўқ. Аммо таҳдид етиб келган. Эрон парламентининг қарори – бу фақат сиёсий ишора эмас, балки глобал иқтисодиёт учун сигнал сифатида баҳоланмоқда.
