Гаагада бўлиб ўтган НАТО саммитининг асосий сессиясида Доналд Трамп "Россия у президент бўлганида НАТОга ҳеч қачон ҳужум қилмаслигига ваъда берди". Бу ҳақда The Washington Post Европанинг уч расмий вакилига таяниб хабар берди.
Саммитнинг асосий мавзуси НАТО мудофаа харажатларини ялпи ички маҳсулотнинг 5 фоизигача ошириш бўлиб, бу борада иттифоқ аъзолари келишиб олдилар. Бундан ташқари, Трамп саммитда Украина президенти Владимир Зеленский билан учрашди.
Трампнинг сўзларига кўра, суҳбат давомида улар ўт очишни тўхтатиш масаласини муҳокама қилмаган — у Зеленский билан шунчаки "вазият қандайлигини билмоқчи бўлган". Кейинроқ Украина президенти ҳам "жанг майдонидаги вазият ҳақида гаплашганини" айтди.
Саммитнинг якуний декларациясида ҳам Украинадаги уруш ҳақида сўз юритилмаган.
