Маълум қилинишича, жорий йилнинг 21 июнь куни соат 14:30 да Учтепа туманининг 31-мавзеси ҳудудида икки нафар фуқаро тортишиб қолган ва томонлар ўзаро жанжаллашиб кетган. Жанжал вақтида фуқаро У.М. ўткир тиғли жисм билан фуқаро Н.Т. га тан жароҳати етказган ҳамда ҳодиса жойидан яширинган. Оқибатда жабрланувчи “чап кўкрак қисмининг санчилган-кесилган жароҳати” ташхиси билан шифохонага жойлаштирилган.
Ҳодиса жойига етиб келган ҳудудий профилактика инспектори мазкур жиноятни содир этган шахсни топиб, уни ушлаш чораларини кўрган. Айнан ўша вақтда эса У.М. унга ҳам пичоқ билан тажовуз қилиб, фаол қаршилик кўрсатган. Кўрилган чора-тадбирлар натижасида гумонланувчи далилий ашё (Н.Т. га тан жароҳати етказган пичоқ) билан профилактика инспектори ва ППХ ходимлари томонидан қўлга олинган ҳамда терговга жалб қилинган.
ИИО ходимлари тан жароҳати олмаган.
Мазкур ҳолат юзасидан Жиноят кодексининг 105-моддаси (қасддан баданга ўртача оғир шикаст етказиш) 2-қисми “м” банди билан жиноят иши қўзғатилган ҳамда дастлабки тергов ҳаракатлари олиб борилмоқда. Билдирилишича, тергов якуни бўйича қонуний қарор қабул қилиниши таъминланади.
