АҚШнинг Эрондаги виртуал элчихонаси Америка фуқароларини зудлик билан мамлакатни тарк этишга чақирди. Тегишли хабарнома дипломатик ваколатхона веб-сайтида жойлаштирилган.
"АҚШ фуқароларига Эронга ташриф буюрмаслик қатъий тавсия этилади. Аллақачон мамлакатда бўлганлар зудлик билан чиқиб кетишлари керак. Агар улар кетиш имкониятига эга бўлмаса, узоқ вақт яшириниб юришга тайёр туришлари керак", дейилади хабарда.
Хабарда АҚШ Эрон билан дипломатик ва консуллик алоқаларини сақлаб қолмаслиги, Швейцария Вашингтон манфаатларини ҳимоя қилиши эслатиб ўтилган.
АҚШ фуқароларига Эронни Озарбайжон, Арманистон ёки Туркия билан чегара орқали тарк этиш имкониятини кўриб чиқиш тавсия этилади.
"Озарбайжоннинг қуруқликдаги чегаралари ёпиқ бўлса-да, америкаликлар 15 июн куни махсус рухсатнома билан Астара назорат-ўтказиш пунктидан ўтишлари мумкин бўлади," дейилади хабарда.
Чегарага боришдан олдин Озарбайжон расмийларидан тегишли рухсат олиш керак. Уни рўйхатдан ўтказиш АҚШнинг Бокудаги элчихонаси томонидан ташкил этилиши керак.
