Украинанинг Констиантинвка ва Дружкивка шаҳарлари доимий ўққа тутилмоқда. Донетск вилояти ҳарбий маъмурияти раҳбари Вадим Филашкин фуқароларни зудлик билан хавфсиз ҳудудларга эвакуация қилишга чақирди.
Сўнгги 24 соат ичида Констиантинвкада 2 та авиазарба ва ракета ҳужуми содир бўлди. Натижада 4 киши ҳалок бўлди, 1 нафари жароҳат олди. 14 та хусусий уй, 4 та кўп қаватли бино, маъмурий бино, автомобиллар ва 5 та электр узатиш линияси узилган.
Дружкивкада эса ФПВ-дрон ҳужуми оқибатида яна бир киши ҳалок бўлган.
Украинадаги ОСИНТ-лойиҳа DeepState маълумотига кўра, Россия қўшинлари Констиантинвкадан 10–15 км масофада жойлашган.
