Мексикада номаълум қуролли шахслар Групо Minero Bacis компаниясига тегишли, қиймати миллионлаб долларга тенг 33 тонна олтин ва кумуш концентратини ташиётган юк машинасини ўғирлаб кетишди.
Ҳодиса Дурангодан Манзанилло порти томон ҳаракатланаётган шосседа содир бўлган. Ҳужумчилар икки оқ машина ёрдамида юк машинасининг йўлини тўсиб, ҳайдовчи ва қўриқчиларни таҳдид остида 1,5 соат гаровда ушлаб туришган, сўнг эса уларни соғ-саломат қўйиб юбориб, юк машинасини ва қимматбаҳо металл ортилган тиркамани олиб кетишган. Кейинчалик машина топилган, аммо тиркама ҳануз йўқ.
Юк ортилган концентрат оддий рудадан фарқли ўлароқ, қимматбаҳо металларни юқори миқдорда сақловчи ярим тайёр маҳсулот ҳисобланади. У соф олтин ёки кумуш олиш учун эритиш заводларига юборилади.
El Financiero'нинг ёзишича, компания эгаси Хосе Хайме Гутиéррес Nunies — Мексиканинг нуфузли саноатчиларидан бири. У нафақат Grupo Minero Bacis компаниясига раҳбарлик қилади, балки яна 12 та йирик компаниянинг директорлар кенгашида фаолият юритади.
Расмий маълумотларга кўра, Мексикада ҳар 50 дақиқада бирорта талончилик ҳолати қайд этилади. 2025 йилнинг дастлабки икки ойида ўғирликлар сони ўтган йилга нисбатан 30 фоизга ошган. Шунга қарамай, 33 тонна концентратнинг ўғирланиши бу соҳада мисли кўрилмаган воқеа сифатида қайд этилди.
