Хорижий ва нодавлат олий таълим ташкилотлари ҳамда уларнинг филиалларига ажратилган 1 452 та, шунингдек, қорақалпоғистонлик ёшлар учун белгиланган 200 та мақсадли квота доирасидаги имтиҳонларга рухсатномалар эълон қилинди. Бу ҳақда Таълим ва илм-фан вазирлиги хабар берди.
Тест синовлари 2026 йил 28 октябрь, чоршанба куни ўтказилади.
Талабгорлар имтиҳонга кириш рухсатномасини my.uzbmb.uz сайтидаги шахсий кабинети орқали юклаб олиши мумкин. Унда тест ўтказиладиган сана, манзил ва аниқ вақт кўрсатилган.
Абитуриентлардан имтиҳон жойига белгиланган вақтдан кечикмай етиб келиш сўралган. Имтиҳон биноларига фақат паспорт ёки ID-карта орқали киришга рухсат берилади.
Шунингдек, талабгорларга имтиҳон ҳудудига электрон қурилмалар, сумка, китоб ва ёзув қуроллари каби буюмларни олиб кирмаслик эслатилган.
Маълумот учун, нодавлат ва хорижий олийгоҳлар талабалари учун давлат гранти танловига аризалар 10–17 октябрь кунлари қабул қилинган эди.
