АҚШ Россияга қарши "жуда қатъий божлар" жорий қилади, бу 50 кун ичида амалга оширилади — Доналд Трамп. Бу ҳақда Қўшма Штатлар президенти Оқ уйда NATO бош котиби Марк Рютте билан учрашув чоғида маълум қилди.
Трампнинг айтишича, агар 50 кун ичида Украина билан тинчлик келишувига эришилмаса, Россияга нисбатан "иккиламчи божлар" қўлланилади ва улар 100 фоизни ташкил этади.
АҚШ президентининг бошқа баёнотлари:
Украинага қурол-яроғ етказиб беришимизни NATO ва АҚШнинг алянсдаги доимий вакили мувофиқлаштиради;
Биз энг яхши қуролларни ишлаб чиқарамиз, уларни NATO'га юборамиз, алянс эса уларни учинчи давлатларга, хусусан, Украинага топшириши мумкин;
NATO орқали Украинага қурол етказиб бериш харажатларини Европа давлатлари қоплайди. Яъни, АҚШ қуроллари энди Украинага бепул етказилмайди;
Тез орада Украина ўзини қудратлироқ ҳис қилади;
Мен 100 фоизлик божларни Конгресснинг рухсатисиз жорий қилишим мумкин. 500 фоизлик ва 100 фоизлик божлар бир хил таъсир кўрсатади;
Путиндан ҳафсалам пир бўлди, чунки мен икки ой олдин у билан келишувга эришаман деб ўйлагандим, аммо бу содир бўлмади;
Европага 17 та Patriot тизимини юборишга тайёрланяпмиз, уларнинг кўпчилиги кейинчалик Украинада бўлади;
Ҳозирча биз келиша олмаган ягона давлат — бу Россия;
Айрим мамлакатлар Киевга ўзларида мавжуд Patriot ҳаво ҳужумига қарши мудофаа тизимларини топширади, АҚШ эса уларнинг ўрнини янги мажмуалар билан тўлдиради;
Украинага келажакда ҳарбий ёрдам етказиб бериш нафақат Patriot учун ракеталарни, балки ушбу тизим батареяларини ҳам ўз ичига олади;
Мен Путин билан бу урушни тўхтатиш кераклиги ҳақида жуда кўп гаплашаман. Мен гўшакни қўяман ва "ажойиб суҳбат бўлди", дейман. Аммо кейин яна ракеталар Киевга учади. Суҳбатлар ҳеч нарсани англатмайди. У билан суҳбат жуда ёқимли, аммо ўша туннинг ўзида яна ракеталар учирилади... Мен уни "қотил" деб атамоқчи эмасман, лекин у ажойиб йигит. У Бушни, Обамани алдади, лекин мени алдай олмайди.
