НАТО бош котиби Марк Рютте бу йил Истанбулда бўлиб ўтган Украина-Россия музокаралари юзасидан Россия раҳбари Владимир Путинни танқид остига олди. Унинг айтишича, Россия музокараларга “жиддий одамлар”ни эмас, тарихчи олиб келган.
“Мен эслайман, қандай қилиб сиз [Доналд Трамп] Марко Рубио ва Стив Уиткофф билан бирга Истанбулдаги музокараларни ишга туширдингиз. Мен ўзим ҳам май ойида НАТО ишлари бўйича Туркияда эдим.
Биз ҳақиқатан ҳам украиналикларга босим ўтказдик ва улар жиддий делегация юборди. Аммо руслар қандайдир тарихчи билан келишди. У бизга 1250 йилдан бошлаб Россия тарихини тушунтира бошлади”, — дейди Рютте АҚШ собиқ президенти Доналд Трамп билан ўтказилган матбуот анжуманида.
Унинг ушбу танқидий сўзлари Россия президенти ёрдамчиси Владимир Мединскийга қаратилгани айтилмоқда. Мединский музокараларда Россия делегациясига бошчилик қилган ва тарих фанлари доктори ҳисобланади.
Эслатиб ўтамиз, июнь ойида ҳам Рютте музокараларга Мединский эмас, Путиннинг ўзи келиши кераклигини таъкидлаган эди. “У бу ерда аллақачон икки марта бўлди. У бизга XII асрдан бошлаб Россия ва Украина тарихини айтиб бермоқчи бўлади”, — деган эди НАТО раҳбари.
Мединский эса бунга жавобан қисқа қилиб айтган: “XII асрда Украина йўқ эди.”
