Толибон ҳаракати етакчиси Ҳайбатуллоҳ Охундзода фармони билан ўзбек толибларининг энг нуфузли қўмондони Қори Салоҳуддин Аюбий Афғонистоннинг Логар вилоятига ҳоким этиб тайинланди. Бу ҳақда “Стратегиc Focus: Central Asia” манбаси хабар бермоқда.
Расмий лавозим, норасмий назорат
Экспертлар фикрича, бу тайинлов ортида Толибоннинг пуштун элитасининг стратегик ниятлари яширин: улар Аюбийни Шимолдан узоқлаштириш орқали унинг минтақадаги таъсирини камайтирмоқчи.
Эндиликда у Кобулда яшаб, ишга Логарга қатнайди — бу эса марказий разведка хизматларига уни мунтазам назорат остида ушлаб туриш имконини беради.
ИШИД билан алоқалар фонида
Қори Салоҳуддиннинг “ИШИД – Хуросон” билан яқин алоқада бўлгани ҳақида аввал ҳам хабарлар чиққан.
Унинг Логарга тайинланиши айрим таҳлилчилар томонидан бу алоқаларни узиш ва уни Толибон доирасида “назорат остидаги кадр”га айлантириш ҳаракати сифатида баҳоланмоқда.
Яширин таҳдид иддаолари
Бошқа манбаларнинг айтишича, бу тайинлов ортида ундан бутунлай қутулиш режаси ҳам ётган бўлиши мумкин. Яъни, уни айнан Логарда жисмонан йўқ қилиш эҳтимоли истисно этилмайди.
Бу вазият Афғонистон шимолидаги этник гуруҳлар, хусусан ўзбеклар ўртасидаги куч мувозанатини ўзгартириши мумкин. Шунингдек, Толибон ичида этник рақобат, махсус хизматларнинг кучайиб бораётган роли ва марказлашган назорат тизимининг шаклланиши борасида муҳим ишоралардан биридир.
