Трамп Россия нефтини харид қилаётганларга 100 фоизлик бож жорий қилади – АҚШ сенатори Линдси Грэм. Бу ҳақда Anadolu Agency нашри хабар берди.
Унинг сўзларига кўра, Дональд Трамп Владимир Путинга қарши қаттиқ чоралар кўради, жумладан, Россия нефтини харид қилаётган давлатларга 100 фоизлик бож жорий этади.
"Путин, сенинг навбатинг яқинлашмоқда. Президент Трамп сенга қарши кескин чоралар кўради. У Россия нефтини сотиб олувчиларга, жумладан, Хитой, Ҳиндистон ва Бразилияга бож қўймоқчи. Бу уч давлат Россия арзон нефтининг тахминан 80 фоизини сотиб олмоқда. Шунинг учун ҳам Путиннинг “ҳарбий машина”си ҳали ҳам ишламоқда. Путин санкциялардан қўрқмайди, у рус аскарларини ўлимини ҳам инобатга олмаяпти. Аммо Хитой, Ҳиндистон ва Бразилия яқин орада муҳим танлов олдида қолади — АҚШ иқтисодиёти ёки Путинга ёрдам. Менимча, улар АҚШ иқтисодини танлайди”, — деди Грэм.
Эслатиб ўтамиз, Трамп Путинга Украина бўйича келишувни имзолаши учун 50 кун вақт берган ва акс ҳолда янги санкциялар қўллаш билан таҳдид қилганди. Бу муддатнинг бир ҳафтаси аллақачон ўтиб бўлди.
