Бухоро вилоятининг Ғиждувон туманида 1985 йилда туғилган, илгари судланган фуқаронинг яшаш хонадонидан 90 мингдан ортиқ турли номдаги чет элда ишлаб чиқарилган оздирувчи кофелар аниқланди.
Фармацевтика маҳсулотлари хавфсизлиги маркази хулосасига кўра, ушбу маҳсулотлар таркибида “сибутрамин” мавжуд — бу моддалар Вазирлар Маҳкамасининг 2019 йилдаги қарорига кўра кучли таъсир қилувчи модда сифатида рўйхатга олинган.
Мазкур ҳолат юзасидан Жиноят кодексининг 251-1-моддаси 5-қисми билан жиноят иши қўзғатилди. Дори воситаларининг мамлакатга қандай олиб кирилгани юзасидан тергов ҳаракатлари давом этмоқда.
