ByteDance’га қарашли TikTok компанияси Берлиндаги 150 га яқин контент модераторлари ва TikTok Ливеънинг 15 нафар ходимини ишдан бўшатишни режалаштираётгани сабабли, 23 июль куни ходимлар бир кунлик иш ташлаш эълон қилди. Немис профсоюзи
“Ver.di” маълумотига кўра, ходимлар бир неча ой давомида сунъий интеллектни ўзлари ўргатган, энди эса уларнинг ўрнини айнан шу технология эгалламоқчи.
Ишчилар Шпре дарёсида қайиқда юриш тарзида норозилик билдирган, сўнгра митинг ўтказган. Улар компаниядан уч йиллик иш ҳақи миқдорида компенсация ва ишдан бўшатиш ҳақида 12 ой олдин огоҳлантиришни талаб қилмоқда. TikTok раҳбарияти бу талабларни рад этган.
“Ver.di” маълумотича, айрим хорижлик ходимлар учун бу ишдан айрилиш яшаш рухсатига ҳам таҳдид солиши мумкин.
