Россия матбуот котиби Дмитрий Песков Истанбулда ўтган сўнгги музокараларни изоҳлаб, икки давлат етакчилари учрашуви эҳтимоли фақат мазмунли музокаралардан кейин кўриб чиқилишини маълум қилди. Кремль Киевнинг август охиригача учрашув ўтказиш таклифига эҳтиёткорона муносабат билдирди.
Россия ва Украина Президентларининг олий даражадаги учрашуви фақат мазмунли ва пухта тайёрланган музокаралардан кейин амалга оширилиши мумкин. Бу ҳақда Россия Президентининг матбуот котиби Дмитрий Песков 24 июль куни баёнот берди.
У Истанбулда кеча бўлиб ўтган музокараларнинг учинчи раундини шарҳлар экан, Россия бу галги учрашувдан катта натижалар кутмаганини, бироқ гуманитар масалаларни муҳокама қилиниши ва ишчи гуруҳлар яратиш ташаббусини ижобий баҳолаётганини таъкидлади.
Песковга кўра, Кремль конструктив ва мазмунли кун тартибини илгари сурмоқда, аммо Путин ва Зеленский учрашувини август охиригача ташкил этиш қийин бўлиши мумкин — бу жараён жиддий тайёргарликни талаб қилади.
Шунингдек, Песков Россия ҳарбийлари Украина билан чегарада хавфсизликни таъминлаш учун зарур чораларни кўраётганини, шунингдек, Украина ҳудудида гаровда қолаётган тинч аҳолининг тақдири борасида хавотирда эканини билдирди.
АҚШ билан муносабатларга тўхталар экан, у Вашингтон билан алоқаларни керак бўлса тезда тиклаш мумкинлигини айтди. Бироқ Путин-Трамп учрашуви бўйича ҳали аниқ режа йўқлигини маълум қилди.
Аввалроқ, Украина делегацияси раҳбари Рустам Умаров Истанбулдаги музокаралардан сўнг Киев Путинга август охиригача учрашув ўтказишни таклиф қилганини билдирганди. Шу билан бирга, The Times нашри Доналд Трамп сентабрда Хитойда Путин билан учрашиши мумкинлигини ёзган эди.
